وقــفـــه مع كل رجــل (( بقلمي

السلام عليكم ورحمه الله وبركاته ,,

صراحه أول مره أدخل يجبرني قلمي أني أكتب هنا لموقف بل مواقف شفتها وبعضها صار قدام عيني والبعض الآخر سمعتها بأذني

وكان سبب كبير لموضوع واحد له حجمه الكبير في المجتمع وهو الطلاق

ويرجع السبب والعامل الكبير لسوء فهم كلا الطرفين لأحدهم الآخر

بالبداية حبيت أتكلم عن بعض الرجال ومعاملتهم للجنس الآخر من أخ لأخته او زوج لزوجته لكن حديثي هنا بيخص المتزوجين

مع اني مو متزوج لكن حبيت أسرد سطور كانت في قلبي ..

طبعاً صحيح يمكن يكون الخطأ من الرجل ويمكن يكون من المرأه لكن بما إني رجل

ودي كل رجل يسمعني ونكون احسن من المرأه لان ربي ميزنا بالحكمه أكثر منهم بينما ميزهم بالعاطفه أكثر

نبدأ بالنقطة الأولى األا وهي المعاملة الحسنة

الرجل معروف بخشونته وهيبته والمرأة معروفة بأنوثتهـــــــــــــا والنعومة

وأنتم عارفين أن المرأة نسمة الهواء تاثر فيها
كيف من كلمة ؟أو فعل ؟
أضرب لكم مثال كثير من الرجال مايساعد زوجته بالبيت ليش طيب؟

أنا مأقول أنه مافيه احد مايساعد زوجته بالعكس أنا اعرف ناس ماشاء الله عليهم
بس أنا أتكلم عن الأغلبية

ولو تسأله يقول هذا شغل الحرمة مالي شغل أنا ؟؟؟
ليش طيب مالك شغل؟
وش يبي يضرك بيوم لو جربت ودخلت مع زوجتك للمطبخ وجلست تساعدها لو بأبسط الأشياء

بالعكس يعني زوجتك راح تحبك أكثر وأنت بتحس بسعادة كبيرة جداً

يعني الزواج كله مشاركة لازم يتشارك الأثنين بكل الأشياء لحياة سعيدة وممتعة

نجي للشي الثاني واللي هي الأحساس المعدوم

فيه رجال وأنا أحس أنهم 70%أحساس مافييه

يعني لدرجة كبيرة والله

يعني مثلا واحد أول مايقوم من النوم مايقول لزوجته صباح الخير؟ليش طيب؟بيضرك؟
وتجيك الخشة كنه حادث من قوة أنه مبوز ؟ليش ياخي؟

وش يبي يضرك أول ماتقوم من النوم
تقول لزوجتك صبحك الله بالخير بأبتسامة حلوة
ماتعرف قد أيش تعني للمرأة هالكلمة وهالأبتسامة ..

ومثلا وأنت طالع أنت وزوجتك بالسيارة موديها لأهلها قبل لاتنزل حسسها أنك بتفقدها
لو ساعتين وقبل لاتنزل قولها كلمة حلوة وبعد ماتنزل
مثلا ارسل رسالة لجوالها فقدتك ومشتاق لك يعني شوف كيف وهو كلام يعني ماراح يخسرك أي شي

النقطة الثالثة والأخيرة والمهمة (الهدية)

يمكن البعض أول ماتطري له هالكلمة يحس أنه شي غالي مثلا طقم ألماس؟ساعة؟يحس أنه شي غالي شوي

يعني نضرب لكم مثال بسيط جداً ..
بعض الرجال مايجيب لزوجته هدية ألا يمكن بالسنة مرة ويمكن تكون هدية محترمة صحيح

بس يعني مثلا بدون أي مناسبة وبدون أي شي يومك العادي مثلا وأنت راجع من الدوام
تمر لك أي محل يبيع ورد وتجيبه لها وتعطيها أنا أبصم بالعشرة أن هالوردة تعني لها أكثر من طقم الألماس
الهدية مو بقيمتها الهدية بمعناها
بإختصار شديد
الصراحه الحرمه لو كلمه حلوه بتغير معاملاتها لك تماماً وهذا بيكون مردود ايجابي لك من حيث معاملتها لك

أتمنى الموضوع يفيد الجميع..